Grafisk profil

Den kulturelle skulesekken – éi ordning, éin profil og felles logo.

Velkommen til designmanual for Den kulturelle skulesekken (DKS). Her kan du lese om retningslinjer for bruk av den visuelle identiteten og laste ned nødvendige filer.

Kulturtanken har utarbeidd logo og visuell profil for Den kulturelle skulesekken. Målet er å ha ein felles visuell identitet for Den kulturelle skulesekken i heile landet. Ein felles identitet bidreg til å styrkje felles eigarskap til ordninga, og til attkjenning for alle som er del av eller påverka av ordninga.

Logo

Nasjonal logo for DKS finst på bokmål, nynorsk, samisk og engelsk, i ståande og liggjande versjon. Logoikonet er felles for DKS i heile landet, og er bygd opp på det gylne snittet. Dette kan brukast som profilbilete i sosiale medium, eller som eit «kvalitetsstempel» på flater der namnetrekket ikkje må inkluderast.

Lokale DKS-logoar

Den kulturelle skulesekken er ei nasjonal ordning, men har samtidig sterk regional og lokal tilknyting. Derfor bruker fylkeskommunane eigne fargar i DKS-logo og uttrykk. Det er utarbeidd DKS-logoar for alle fylke og kommunar i landet, i både farga, svart og kvit variant. Logoane finst i bokmål, nynorsk og samisk skriftspråk, avhengig av lokale behov.

Logo for DKS kan nyttast åleine eller saman med fylkes- eller kommunevåpen, på nettsider, trykt materiell eller i sosiale medium. Kvart namnetrekk har ein ståande og liggjande versjon. Logoane er tilgjengeleg i høgopplausleg vektor-versjon (AI-fil) for bruk på trykte flater, og i lågopplausleg versjon (PNG-fil) for bruk på skjerm.

Ikon og grafiske former

Det er teikna seks ikon som representerer dei ulike kunst- og kulturuttrykka i DKS: kulturarv, film, visuell kunst, litteratur, musikk og scenekunst. Ikona kan brukast for å forsterke kva for eit av områda som blir kommuniserte, og kan også brukast samla for å vise breidda av uttrykk.

Ikona finst i blå, svart og kvit variant, og som farga sirkelikon, der kvart uttrykk har fått tildelt ein eigen farge frå fargepaletten for DKS. Ikona er tilgjengeleg i høgopplausleg vektor-versjon (AI-fil) for bruk på trykte flater, og i lågopplausleg versjon (PNG-fil) for bruk på skjerm.

Ikona kan også brytast opp i ulike grafiske former for å skape eit kreativt og leikent uttrykk tilpassa bodskapen. Sirkel, firkant og trekant er grunnformer som kan nyttast, anten som bakgrunn for tekst eller i eit frittståande, systematisk mønster. Sjå døme under Trykte flater.

Typografi

Den kulturelle skulesekken har ein hovudfont for trykte flater og nettsider, ein støttefont som kan nyttast til overskrifter og annan utheva tekst, og ein systemfont (som finst som standard i dei fleste tekstverktøy) for Office-dokument.

Hovudfont

Merriweather Sans blir brukt til alt trykt materiale, som rapportar, brosjyrar og plakatar, og til nettsider. Fonten er tilgjengeleg for nedlasting frå Google Fonts, og kan nyttast fritt.

Støttefont

Merriweather er ein seriff-font i same familie som Merriweather Sans. Støttefonten kan brukast til alt trykt materiale og til nettsider, men berre til overskrifter og annan utheva tekst. Fonten er tilgjengeleg for nedlasting frå Google Fonts, og kan nyttast fritt.

Systemfont

Calibri blir brukt i alle Office-dokument og -presentasjonar, og andre stader der det er unaturleg eller komplisert å bruke profilfonten. Fonten er tilgjengeleg som standard i alle Office-program, som Word og PowerPoint.

Fargar

Alle fylkeskommunar bruker eigne fargar i DKS-logo og uttrykk. På nasjonalt nivå har DKS følgjande profilfargar, som skal nyttast systematisk i kombinasjon med kvarandre. Val av fargar blir gjort basert på ønskt uttrykk, flate og formål, samtidig som fargebruk og kontrastar må oppfylle krav om universell utforming.

Det er fire hovudpalettar med fargekombinasjonar som alltid skal prioriterast i generelt materiell, men unntaksvis kan andre kombinasjonar nyttast. Fargane kan brukast i ulik mettingsgrad basert på opacity: 80% – 50% – 20%, og dei kan alltid brukast i kombinasjon med svart og kvit.

Blå palett

Raud-oransje palett

Lilla palett

Grøn palett

Andre fargar

Foto

Kulturtanken og Den kulturelle skulesekken har eit rikt biletarkiv som dekkjer mange uttrykk og behov. I designet er det lagt opp til stor variasjon av både bilete og illustrasjonar. Vi bruker helst bilete med mykje glede, energi og engasjement, gjerne i fargar som harmonerer med fargepaletten. Særleg barn og unges møte med kunst og kultur, og utøvarar som brenn for det dei driv med, er tema som går igjen.

Bileta i biletarkivet DKS-illustrasjonsbilder kan nyttast vederlagsfritt av DKS-administrasjonar til nettsider og anna informasjonsmateriell om DKS, fortrinnsvis med kreditering. Ta kontakt med Kulturtankens kommunikasjonseining for annan type bruk, eller viss du ser etter spesifikke bilete eller tema.

Trykte flater

For trykt materiell kan grafiske former, fargar og foto kombinerast på ulike måtar. Foto blir gjerne brukt som eit stort, heildekkjande element. For å strukturere innhaldet og forsterke den visuelle identiteten blir grafiske former nytta. Det er som regel ideelt å nytte ein av hovudpalettane i samspel med bilete og/eller grafiske former.

Digitale flater

Prinsippa frå trykte flater blir også implementerte i digitale flater, som nettsider, sosiale medium, annonsering og Powerpoint-presentasjonar. Ulike kanalar krev ulik tilpassing, men logobruk, typografi, fargar og former bidreg til ein gjennomgåande identitet.

Har du spørsmål om grafisk profil for Den kulturelle skulesekken?
Ta kontakt med Kulturtankens kommunikasjonseining